Presidenti i Shteteve të Bashkuara, Donald Trump, ka njoftuar se është arritur një marrëveshje që ai e cilësoi "historike" për çarmatimin e plotë të Hamasit dhe të organizatave të tjera të armatosura në Rripin e Gazës.
Në një postim në platformën Truth Social, Trump e përshkroi marrëveshjen si një hap të rëndësishëm drejt paqes dhe sigurisë afatgjatë në rajon, duke deklaruar se ajo hap rrugën për krijimin e një forme të re qeverisjeje në Gaza.
Sipas presidentit amerikan, territori do të kalojë gradualisht nën administrimin e një qeverie të re palestineze, e cila do të bashkëpunojë me një Këshill të Paqes dhe do të ketë si mision mbështetjen e popullsisë palestineze.
Trump deklaroi gjithashtu se Izraeli do të përfitojë, sipas tij, "sigurinë që meriton", duke shtuar se Gaza nuk do të mund të përdoret më si bazë për sulme.
Sipas deklaratës së tij, zbatimi i marrëveshjes do të kryhet në disa faza. Ai tha se, ndërsa procesi i çarmatimit avancon, forcat izraelite do të tërhiqen gradualisht nga Gaza.
Trump shtoi se siguria në territor do të garantohet nga një Forcë Ndërkombëtare Stabilizimi, në bashkëpunim me një forcë të re policore palestineze, me synimin për të garantuar sigurinë e banorëve të Gazës dhe të vendeve fqinje.
Presidenti amerikan e lidhi këtë zhvillim me planin e tij 20-pikësh për Gazën, duke e cilësuar marrëveshjen një moment vendimtar drejt stabilitetit në Lindjen e Mesme.
Duke iu referuar situatës së një viti më parë, Trump përmendi luftën, krizën humanitare dhe çështjen e pengjeve, duke deklaruar se është arritur "përparim historik", megjithëse, sipas tij, mbetet ende shumë punë për t'u bërë.
Në përfundim të deklaratës, Trump falënderoi Egjiptin, Katarin dhe Turqinë për rolin e tyre ndërmjetësues në negociata, si edhe ekipin e tij, të cilit i atribuoi arritjen e kësaj marrëveshjeje.
