Kreu i Grupit Parlamentar të Partisë Demokratike, Gazment Bardhi, ka deklaruar se opozita i është drejtuar Gjykatës Kushtetuese për të kundërshtuar procedurën e ndjekur nga Kuvendi për miratimin e marrëveshjes së huasë prej 302 milionë eurosh mes Shqipërisë dhe Shteteve të Bashkuara për blerjen e pajisjeve ushtarake.
Në një deklaratë për mediat, Bardhi tha se opozita nuk është kundër marrëveshjes në parim, por kundërshton mënyrën se si ajo u miratua, duke e cilësuar procedurën si antikushtetuese. Ai pretendoi se deputetëve iu mohua e drejta për t'u njohur me përmbajtjen e marrëveshjes dhe se nuk u respektuan afatet kushtetuese.
Sipas Bardhit, opozita kishte paralajmëruar më herët se procedura e ndjekur do ta bënte të pashmangshëm kontrollin nga Gjykata Kushtetuese dhe kishte kërkuar respektimin e afateve ligjore.
Ai akuzoi gjithashtu mazhorancën se, sipas tij, me urdhër të kryeministrit Edi Rama, Kuvendi u kthye në “noter të qeverisë”.
Bardhi bëri të ditur se Partia Demokratike ka identifikuar shtatë shkelje kushtetuese, që sipas saj lidhen me mosrespektimin e të drejtave të deputetëve, procedurën e përshpejtuar të miratimit, mungesën e dokumentacionit shoqërues dhe pamundësimin e kontrollit kushtetues të marrëveshjes përpara ratifikimit.
Sipas tij, opozita i ka kërkuar Gjykatës Kushtetuese shfuqizimin e ligjit ratifikues dhe pezullimin e zbatimit të tij, duke theksuar se marrëveshja duhet të miratohet me një procedurë që respekton Kushtetutën dhe standardet parlamentare.
