Ish-zëvendësministri i Drejtësisë, Arben Isaraj, ka publikuar një reagim me tone kritike ndaj kryeministrit Edi Rama, duke u ndalur te rëndësia e besës, besimit dhe ndershmërisë në jetën publike dhe në qeverisje.
Përmes një postimi në rrjetet sociale, Isaraj thekson se besimi është një nga shtyllat themelore mbi të cilat ndërtohet çdo shoqëri e qytetëruar, ndërsa nënvizon se ai nuk fitohet me deklarata, por ndërtohet me karakter, përgjegjësi dhe integritet.
Sipas tij, institucionet, drejtësia, ekonomia, familja dhe marrëdhëniet mes njerëzve funksionojnë vetëm kur ekziston besimi te fjala e dhënë dhe ndershmëria.
"Në kulturën shqiptare ky besim mishërohet në një nocion të veçantë etik – besën, e cila përfaqëson jo vetëm mbajtjen e fjalës së dhënë, por edhe përgjegjësinë morale për të qenë i vërtetë dhe i besueshëm", shkruan Isaraj.
Ai thekson se gënjeshtra mund të sjellë përfitime të përkohshme, por lë pasoja afatgjata në marrëdhëniet njerëzore dhe dëmton integritetin moral të individit.
Në reagimin e tij, ish-zëvendësministri vë në dukje se, në një kohë kur informacioni qarkullon me shpejtësi, ruajtja e besës dhe e besimit mbetet një detyrë etike me rëndësi të veçantë.
"Vetëm mbi themelin e së vërtetës, ndershmërisë dhe përgjegjësisë mund të ndërtohen marrëdhënie të qëndrueshme, institucione të besueshme dhe një shoqëri e drejtë. Si qelqi i pastër, besimi duhet të ruhet me kujdes, sepse një çarje e vogël mund të mos zhduket kurrë plotësisht", përfundon Isaraj.
Mesazhi i tij vjen në një moment të debatit politik në vend, ku çështja e besimit mes qytetarëve dhe institucioneve është kthyer në një nga temat më të diskutuara në hapësirën publike.
